KAF-ip ilisarnaataanut nittartagaanullu nutaamut tikilluaritsi

KAF-ip nutaamik nittartagartaarnerani ilisarnaatitaarneranilu (logo) quppersakkamut tikilluaqqungaarpatsigit. Quppersakkap iliisarnaatillu Nuummi ilinniartunut KAF-illu inaataanni najugaqartunut ikiuinissamik pingaartitsineq nittarsaappaat. Nittartagaq nutaaq qarasaasiakkut oqarasuaatikkullu atoruminartuuvoq.  KAF-ip najugaqartuutiminnut ikiuinissaminut pitsanngorsaaneranut nittartagaq pingaaruteqarpoq, aammalu paasissutissanik ujaasinerup ajornannginnerulersinnissaa siunertaralugu sanaajulluni. Ilinniartut inaannik inissamik qinnuteqarneq, nutaarsiassat paasissutissallu pingaarutillit nittartakkatsinni paasisassarsiorfigisinnaavatit.

KAF-ip ilisarnaataa nutaaq: Ilitsoqqussat siunissarlu ataatsimoorullugit nutaaliorneq

KAF-imi ilisarnaatitaatta nutaap isumaa imarisaalu pingaartutut isigaavut anguniakkatsinnik ersertitsimmata. Ilisarnaatitaarput illut qaliannik pingasunik imaqarpoq, taakkunani nunatsinni illuliortariaatsip qalianillu qummut inngigissunik ilisarnartunik sanariaatsip ilitsoqqussarisatta takujuminartumik saqqummiunnissaa pingaartissimavarput. Illut tunuanni Sermitsiaq ilisarnaqaluni takuneqarsinnaavoq, qalipaatillu ukioq naangajallugu Nuummi takusinnaasakkagut aappalaartut seqerngup nuilernerani tarrilerneranilu alutorisuaannakkatta Sermitsiaq qinngoqqavaat ersarissisillugu. Seqerngup aappilliunnerata pinngortitap kusanassusaa kisiat ersersinngilaat, KAF-ip siunissamut anguniagaanik nunatsinnilu ineriartoqataaneranut aamma takutitsivoq.

Qattuneq illut napaffigisaat nunatsinni qattornit ungaleriiaat takussaaqisut takussutissarivaat. Qattunerli aamma atuakkatut ammasutut takorloorneqarsinnaavoq -  Takorlooruk ilinniartut KAF-ip inaataanni ineqartut ullut tamaasa kapitali nutaaq aallartittarmassuk inuunerminni ilinniarnerminnilu ilinniarfigissallugu misigisaqarfigissallugulu.

Allanneq oqaaserlu "KAF" ilisarnaatitaqartinngikkaluarlugu allaffeqarfitsinni kisimi tusassallugu ilisarnartuunngilaq. Nuummi sineriammilu tusarsimagaanni ilisarineqarluartarpoq, uangutsinnullu pingaartuuvoq oqaatsip KAF-ip ilinniartut ilinniarnerminni inuttullu ineriartorneranni ikorfartueqataanitsinnik eqqaasitsisinnaanissaa.

KAF ineriartortitsinissamik pingaartitsisoq – ilinniartunik qitiutitsineq pingaartillugu

KAF-imi suliavut ilinniartunut inissianik attartortitsinermuinnaq tunngassuteqanngillat, aammattaaq ilinniartut pitsaasumik ilinniarfigisinnaasaannik toqqissisimaffigisinnaasaannillu avatangiiseqartinnissaat pingaartipparput. Ilisarnaatitta nittartakkattalu nutaap ilinniartunut ajornannginnerusumik ikiuisinnaanissarput aqqutissiuussinissarpullu ersersippaat. Siunissamut piareersarneq ullutsinnilu pisunik malinnaaneq suliatsinnut suliniutitsinnullu ilaatittuaannarparput. Sulinittalu nalaani ilinniartut piumasaat malillugit qanoq pitsaanerusumik sullissisinnaanerput eqqartortuarparput ineriartorfigalugulu.

Maaniippugut illit Nuummi ilinniarnerit ajoqutaasinnaasutigut aporfissakinnerullutit toqqissisimanartumillu inissaqarlutit ingerlassinnaanerussagakku. Aamma qilanaarivarput ilinniartorpassuit peqatigalugit suleqatigiinnitsigut pitsanngorsaanissatsinnut, taakkuummatami KAF-ip ilinniartunut inaataanni najugaqarusullutik aggersimasut.

‍Neriuppugut ilisarnaatitaarput nittartagarpullu nutaaq nuannarissagitit - KAF-ip ilinniartunut inaataani najugaqarnerni Ikiuunnissatsinnut siunnersuinissatsinnullu qilanaarpugut!

‍